DC Nyang’hwale atangaza Kiama kwa wanaotia Mimba wanafunzi

Posted on: December 10th, 2018

Mkuu wa Wilaya ya Nyanghwale Mhe. Hamim Gwiyama amemuagiza Mkuu wa Jeshi la Polisi Mkoa wa Geita kuwakamata watu wote waliowapa Mimba Wanafunzi Wilayani Nyang’hwale na kuwafikisha kwenye vyombo vya Sheria.

Agizo hilo amelitoa mapema leo wakati akihutubia wananchi kwenye kilele cha maadhimisho ya siku 16 za kupinga Ukatili dhidi ya Watoto na Wanawake hafla iliyofanyika kwenye viwanja vya Sabasaba Wilayani Nyang’hwale.

Gwiyama amesisitiza kuwa watu wote wanaoficha wahalifu wa Ukatili kwa Watoto na Wanawake watachukuliwa hatua kwani suala la kuwalinda Watoto na akina mama dhidi ya Ukatili wa Kijinsia ni la Jamii nzima.

Amewataka Watumishi wa Umma kuzingatia maadili ya Utumishi wao na wakienda visivyo yeye atawashughulikia wote kwa mujibu wa sheria. “kuna Watumishi mnatajwa kula rushwa kwenye kesi za Ukatili wa kijinsia, hakuna atakayebaki salama”…alisema Gwiyama.

Ametumia nafasi hiyo pia kuwasihi Vijana wanaojihusisha na mahusiano na Wanafunzi kuacha mara moja kwani sasa kuna msako mkali na yeyote atakayekutwa na Mwanafunzi atakamatwa na kufunguliwa mashtaka.

Awali Kamanda wa Polisi Mkoa wa Geita Afande Mponjoli alikiri kuwepo kwa Vitendo vya Ukatili Mkoani humo na kusema kuwa anasikitishwa sana kwani vitendo hivyo vinakiuka Haki za Biandamu.

Afande Mponjoli aliwataka Wazazi kutekeleza wajibu wao kwenye suala la Kupinga Ukatili kwa Watoto wao kwani wao ndio walio ngazi ya chini Watoto wanakotoka.“Jamii inapashwa sasa kutambua kuwa Ukatili kwa Watoto ni tatizo, watambue pia kuwa wapo ndani ya Tatizo hilo na waone namna gani wanatoka hapo” …alisema.

Aidha, alitambulisha kuwa Uwazi, Ukweli, Weledi na Uwajibikaji kuwa ni nguzo kuu za kutokomeza Ukatili dhidi ya Watoto na Wanawake.

Akiwakaribisha Wageni kwenye Maadhimisho hayo Mwenyekiti wa Halmashauri ya Nyang’hwale Mhe. Isack John aliwataka Jamii kuwalinda wajane na Yatima waliopo kwenye Jamii zao kwa kuwapa mahitaji yao ya Msingi ili kujenga Jamii imara.

Afisa Ustawi wa Jamii Wilaya ya Nyang’hwale Bi. Zaituni Kiboga alieleza kuwa Idara yake inatoa Huduma za Tiba na Saikolojia kwa waathirika wa Ukatili wa Kijinsia na aliomba Jamii kutoa taarifa za Ukatili hasawa Watoto mapema ili wapatiwe huduma za Kisheria mapema.

Aidha, alitambulisha kuwa zimeundwa kamati mbalimba;I kuanzia ngazi za Vijotnoji hadi wilaya ili kupambana na vitendo vya Ukatili wa Kijinsia Wilayani humo.

Afisa Kutoka Jeshi la Polisi anayeshughulikia Masuala ya kijinsia amesema Matukio ya Ukatili wa Watoto na Wanawake Mkoani Geita yameongezeka kwa kipindi cha mwaka mmoja ambapo ameelezea Umasikini na imani za Kishirikina kuwa chanzo kikubwa cha matatizo hayo.

Amesema Mimba za Utotoni, Mimba kwa Wanafunzi, Ndoa za Utotoni, Kutumikisha Watoto, Unyanyapaa kwa Wajane, Kutelekeza Watoto, Kutoa Mimba, kurithi Wajane, Ukeketaji na Ulawiti ni Miongoni mwa Matukio uya Ukatili kwa Watoto na Wanawake.