DC KINGALAME AWATAKA VIJANA KUZITAMBUA FURSA ZA KIUCHUMI ZINAZOWAZUNGUKA

Posted on: January 17th, 2026

Mkuu wa Wilaya ya Nyang'hwale, Mhe. Grace Kingalame amewataka Vijana kuzitambua na kuzitumia fursa za kiuchumi zinazowazunguka ili kujiletea maendeleo.

Amesema hayo jana, Januari 16, 2026 katika ukumbi wa Shule ya Sekondari Msalala wakati wa Kongamano la Vijana liliwakutanisha Vijana kutoka sehemu mbalimbali za Wilaya.

Amesema Serikali inaendelea kuweka mazingira bora na wezeshi kwa Vijana ili kuwarahisishia kuzitambua, kuzifikia na kuzitumia fursa mbalimbali za kiuchumi zinazowazunguka.

"Wilaya ya Nyang'hwale tunajenga Chuo cha Ufundi Stadi (VETA) kwa ajili yenu Vijana ili muweze kujifunza ujuzi wa fani mbalimbali kama vile udereva, ushonaji, ususi na nyengine nyingi" Ameeleza Mhe. Kingalame.

"Kwa kutambua thamani yenu na kazi yenu niwahakikishie tunao mpango wa kuendesha mafunzo ya usalama barabarani ili muweze kufanya shughuli zenu za usafirishaji bila vikwazo na kwa kufuata sheria" Ameongeza.

Pia, Mhe Kingalame amewaeleza Vijana kuwa ili kupata tija ya kuunda vikundi, wasiunde vikundi kwa kufurahishana bali waunde vikundi kwa kuzingatia vijana wenye malengo yanayofanana.

Kwa upande wao Vijana wameishukuru Serikali kwa kutenga muda wa kusikiliza mawazo yao na kuwawekea mazingira rafiki ya kuzifikia na kuzitumia fursa za kiuchumi.