DC KINGALAME ARIDHISHWA NA MRADI WA VISIMA 5 VYA JIMBO

Posted on: January 16th, 2026

Mkuu wa Wilaya ya Nyang'hwale Mhe.Grace Kingalame ameipongeza Mamlaka ya Usambazaji Maji Vijijini RUWASA kwa utekelezaji wa visima vitano vya jimbo ambapoo mradi huo umefikia asilimia 97% na kufanya Wilaya ya Nyang'hwale kufikia asimilia 77.4% ya Usambazaji wa Maji huku lengo la Serikali likiwa asilimia 85% kwa kila Wilaya.

Amesema hayo jana Januari 15 2026, alipofanya ziara ya kukagua utekelezaji wa mradi wa visima vya jimbo ambavyo vinagharimu Tsh. Milioni 327.09 ikijumuisha gharama za ufungaji wa Sola, pampu (5), vioski (5), uchimbaji na ufukiaji wa mitaro ya bomba, na ujenzi wa chemba kubwa na ndogo.

Mhe. Kingalame amesema mradi huo utavinufaisha Vijiji vitano ambavyo ni Kanegele, Mwingiro, Wavu, Lubando na Shabaka, ambapo katika kila Kijiji kuna kioski ambacho Wananchi wameshanza kupata maji.

Aidha, Meneja wa RUWASA Wilaya, Ndg. Suzana Gogadi amesema mradi ukishakamilika utaenda kunufaisha takribani Wananchi 5,000 waishio katika maeneo ambayo mradi huo umepita, na utaenda kupunguza Magonjwa ya mlipuko kutokana na Wananchi kutumia maji safi na salama.

Kwa upande mwingine Ndg, Kashinde Mchele, Mwananchi wa Kijiji cha Shabaka, ameipongeza Serikali na RUWASA Nyang'hwale kwa kuhakikisha kila Mwananchi anapata huduma ya maji safi na salama kwa gharama ndogo ambayo Mwananchi anaimudu.