DC KINGALAME AMEONGOZA KUFANYA MAZOEZI KUELEKEA KILELE CHA MAADHIMISHO YA MIAKA 60 YA SIKUKUU YA MUUNGANO

Posted on: April 20th, 2024

Kuelekea kilele cha maadhimisho ya miaka 60 ya Sikukuu ya Muungano, Mkuu wa Wilaya ya Nyang’hwale Mhe. Grace Kingalame, leo Aprili 20, 2024 ameongoza Watumishi na Wananchi mbalimbali kufanya mazoezi ya kuweka mwili sawa katika uwanja wa Shule ya Msingi Kharumwa.

Akizungumza na Wananchi baada ya mazoezi hayo, amesema kuwa ni muhimu kuwa na desturi ya kufanya mazoezi kila wakati kwa kuwa mazoezi ni tiba na huimarisha Afya.

Mhe. Kingalame ametoa wito kwa Wananchi wote kujitokeza katika kushiriki kwenye matukio yote yaliyopangwa kufanyika kuelekea kilele cha maadhimisho hayo ya Sikukuu ya Muungano.

Matukio hayo ni pamoja na kuhudhuria maombi na dua maalum ya kuliombea Taifa itakayofanyika Aprili 22, 2024 kuanzia saa mbili Asubuhi katika viwanja vya sabasaba.

Aidha, kuanzia siku hiyo ya Aprili 22, 2024 kila siku Saa kumi jioni hadi kufikia siku ya kilele, Aprili 26, 2024 kutakua na mashindano ya michezo ya mpira wa miguu, mpira wa pete na michezo ya jadi katika viwanja hivyohivyo vya sabasaba.

Tamasha la usiku wa muungano litafanyika siku ya Aprili 25, 2024 kuanzia Saa kumi jioni ambapo kutakua na burudani za vikundi mbalimbali vya kwaya, ngoma, na michezo mbalimbali.

Ambapo, Wananchi wakiwa kwenye viwanja hivyo ikifika muda wa saa tatu usiku wataungana na Watanzania wengine duniani kuangalia matangazo mubashara ya hotuba ya Rais, Mhe. Samia Suluhu Hassan atakapolihutubia Taifa.

Kilele cha maadhimisho hayo kitakua Aprili 26, 2024 ambapo kutakua na fainali ya mchezo wa mpira wa miguu na mpira wa pete.