BENKI YA NMB YATOA ELIMU YA FEDHA KWA VIKUNDI VYA VIJANA, WANAWAKE NA WENYE ULEMAVU

Posted on: January 18th, 2025

Halmashauri ya Wilaya ya Nyang’hwale kwa kushirikiana na benki ya NMB imefanya mafunzo kwa vikundi vya Vijana, Wanawake, na watu wenye ulemavu wanaotarajia kupata mikopo ya 10% inayotolewa na Serikali kupitia Halmashauri.

Mafunzo hayo yamefanyika jana Januari 17, 2025 katika ukumbi wa Kituo cha Uwezeshaji Wananchi Kiuchumi na kuhudhuriwa na vikundi mbalimbali vya Vijana, wanawake na watu wenye ulemavu vinavyojishughulisha na shughuli mbalimbali za ujasiriamali.

Afisa maendeleo ya Jamii (W) Ndg, Majagi Maiga, amesema lengo la mafunzo hayo ni kuwajengea uwezo wa kuzitambua taasisi zinazowezesha jamii zilizopo katika kituo cha uwezeshaji wananchi kiuchumi, namna ya kuendesha vikundi, utunzaji wa fedha na matumizi sahihi ya mikopo.

Afisa Mahusiano wa Benki ya NMB tawi la Nyang’hwale, Ndg, Isaya Lemaso, amesema wamewaelimisha juu ya ufunguaji wa akaunti za pamoja, sifa za akaunti ya pamoja na umuhimu wa kuwa na akaunti ya pamoja.

Aidha, Diwani wa Kata ya Kharumwa, Mhe, Leonard Mgema amevitahadharisha vikundi hivyo kujihusisha na mikopo umiza inayotolewa mitaani na wafanyabiashara na kuvitaka vikundi hivyo kuchangamkia fursa ya kupata mikopo isiyokua na riba inayotolewa na Serikali.

Kwa niaba ya wanakikundi waliohudhuria mafunzo hayo, Mwenyekiti wa Kikundi cha TULEANE ametoa shukrani zake kwa Serikali ya awamu ya Sita inayoongozwa na Mhe, Dkt, Samia Suluhu Hassan kwa kuwapatia fursa ya kupata mikopo isiyo na riba na kuahidi kuyafanyia kazi mafunzo waliyoyapata katika kuendesha vikundi vyao.