BARRICK NA HALMASHAURI WASAINI UTEKELEZAJI WA MIRADI YA CSR 2025

Posted on: May 13th, 2025

Kampuni ya uchimbaji madini, Barrick Bulyanhulu kwa kushirikiana na Halmashauri ya Wilaya ya Nyang’hwale, leo Mei 13, 2024 wamesaini mkataba wa makubaliano ya utekelezaji wa miradi ya wajibu kwa Jamii (CSR) kwa mwaka 2025.

Hafla ya kusaini mkataba huo imefanyika katika ukumbi wa mikutano wa Halmashauri ambapo umeshuhudiwa na viongozi mbalimbali kutoka Ofisi ya Mkuu wa Wilaya na Ofisi ya Mkurugenzi Mtendaji wa Halmashauri.

Mwenyekiti wa Halmashauri, Mhe, John I. John amesema Halmashauri imesaini mkataba huo na kampuni ya Barrick wenye thamani ya fedha za kitanzania Shilingi Bilioni 1.07 ambapo kupitia fedha hizo, Halmashauri itatekeleza miradi mbalimbali ya maendeleo.

Amesema miradi itakayotekelezwa kwa fedha hizo ni pamoja na ujenzi wa madarasa manne katika Shule ya Mchepuo wa kingereza yaani Kharumwa English Medium, Ukamilishaji wa Stendi ya mabasi Ikangala na ununuzi wa madawati katika Shule za Msingi.

Miradi mingine ni ujenzi wa matundu ya vyoo 20 Shule ya Msingi Lubando, na Shule ya Msingi Gulumbai, Ukamilishaji wa Nyumba ya Mtumishi Zahanati ya Nyang’holongo,na Ukamilishaji wa ununuzi wa gari la Wanafunzi katika Shule ya Mchepuo wa kingereza.

Pia, fedha hizo zitatumika kununua samani za zahanati kumi, ununuzi wa trekta, ukamilishaji wa madarasa mawili Shule ya Msingi Lushimba, Ujenzi wa madarasa mawili Shule ya Msingi Kasubuya na Shule ya Msingi Mwamakiliga.

Kutokana na maboresho ya kanuni za CSR, asilimia 40 ya fedha hizo zitatumika kutekeleza miradi katika Kata ya Mwingiro pekee, ambapo kutakua na ujenzi wa Shule Mpya ya Sekondari Iyenze, kuanzisha Shule Shikizi ya Msingi Nyamikonze, kuchimba visima na uwekaji wa sola Zahanati ya Mwingiro na ukamilishaji wa darasa moja Shule ya Msingi Mwingiro.

Katibu Tawala (W), Ndg, Kaunga Omari amesema kwa kuanzia sasa kila mtaalamu akaanze kutekeleza wajibu wake ili itakapofika mwezi Disemba, 2025 miradi yote iwe imekamilika na ianze kutoa huduma kwa Wananchi.