BARAZA LA MADIWANI NYANG’HWALE LABITISHA BAJETI YA BIL 31.0 KWA MWAKA 2023/24

Posted on: January 25th, 2023

Baraza la Madiwani, Halmashauri ya Wilaya ya Nyang’hwale lapitisha bajeti ya Shilingi za Kitanzania Bilioni 31.0 kama bajeti ya utekelezaji wa shughuli za serikali katika Halmashauri hiyo kwa mwaka wa fedha wa 2023-2024. Katika kikao Maalum kilichokaa kwa siku mbili (2) tangu tarehe 24/01/2023 na 25/01/2023 kilichofanyika katika ukumbi wa Halmashauri, Wajumbe wa Baraza Maalum walipokea rasimu ya bajeti ya Halmashauri ya Wilaya ya Nyang’hwale  kwa mwaka wa fedha 2023/2024 kwaajili ya kupitia, kujadili na kupitisha bajeti hiyo.

Akiwasilisha Mpango wa Bajeti katika Mkutano huo Kaimu Afisa Mipango wa Halmashauri Bi Angella Kiwia alisema mpango huu wa bajeti ya mwaka wa fedha 2023/24 umeandaliwa kwa kuzingatia Sheria ya bajeti Na. 11 ya mwaka 2015 pamoja na kanuni zake, Ilani ya Uchaguzi ya CCM ya mwaka 2020/2025, mwongozo wa maandalizi ya mpango wa bajeti wa mwaka 2023/2024, mpango mkakati wa Wilaya kwa mwaka 2020/2021 – 2024/2025, Dira ya Taifa ya Maendeleo yam waka 2025 na Malengo endelevu 2030 ya Umoja wa Mataifa (SDGs).

Bi Angella Kiwia alieleza vipaumbele vilivyozingatiwa katika mpango ni Kukamilisha Miradi Viporo,

Kulipa madeni ya Watumishi na Wazabuni, Kuimarisha na kuboresha mazingira ya biashara na uwekezaji Wilayani kwa wafanyabiashara wadogo na wakubwa, kuimarisha kilimo kwaajili ya upatikanaji wa chakula na kuongeza tija, kuboresha mazingira ya ulipajo kodi kwa hiari na kuogeza wigo wa kodi na kuimarisha na kuhimiza matumizi sahihi ya mifumo ya TEHAMA ya ukusanyaji wa mapato ili kuongeza mapato ya ndani ya Halmashauri.

Bi Angela Kiwia alifafanua kuwa kiasi cha shilingi bilioni 3.5 ni fedha za mapato ya ndani, kiasi cha shilingi bilioni 13.7 ni fedha za Ruzuku (Mishahara na Matumizi mengineyo – serikali kuu), kiasi cha shilingi 8.58 ni fedha za miradi wahisani na Kiasi cha shilingi bilioni 5.1 ni fedha za Miradi (ruzuku).