Amref wamwaga Baiskeli kwa Wahudumu wa Afya Vijijini

Posted on: May 17th, 2018

Jumatano tarehe 16, Mei 2018 Wahudumu wa afya ngazi ya Jamii Wilayani Nyang’hwale na Geita wamegawiwa baiskeli zilizotolewa na Serikali ya Canada chini ya Shirika la Amref watazozitumia kuwafikia wananchi wakati wa kuwapatia huduma.

Akiwashukuru wafadhili hao, Mhe. Hamimu Gwiyama, Mkuu wa wilaya ya Nyang’hwale amewataka Wahudumu kwenda kuzitumia baiskeli hizo kwa malengo yaliyopangwa ili zikasaidie kutokomeza kabisa vifo vya Watoto chini ya miaka mitano pamoja na vifo vitokanavyo na Uzazi.

Wahudumu wa Afya 124 wamenufaika na Vitendea kazi hivyo Wilayani Nyang’hwale ikiwa ni baiskeli moja kwa kila mhudumu ikiwa ni wahudumu wawili kwa kila kijiji kwa vijiji vyote 62, pamoja na baiskeli zingine 310 zilizotolewa kwa wahudumu hao Wilayani Geita.

Aidha, Wakurugenzi wa Halmashauri zote mbili za Nyang’hwale na Geita walielezea furaha zao kwa Serikali ya Canada chini ya shirika la Amref kwa msaada huo pamoja na mingine kama ya Ujenzi wa Vyumba vya upasuaji Viwili kwa kila Wilaya na Ukarabati wa Zahanati nne kwenye kila Wilaya, Ujenzi unaoendelea.

Awali meneja Huduma kwa Jamii kutoka Amref alifafanua kuwa wataendelea kutoa huduma kwa Wahudumu ili kuhakikisha Vifo vya Watoto chini ya miaka mitano na vitokanavyo na uzazi na tayari walishawajengea uwezo ili kuhakikisha wanatoa huduma bora. Viatu na Mavazi ya kukinga ni miongoni mwa vifaa ambavyo wamewagawia siku za karibuni na watawagawia tena mabegi hivi karibuni.

Kwa niaba ya Mganga mkuu wa Wilaya, Ndugu, Alfred Chabila aliwashukuru Amref kwa msaada huo na mingi wanayotoa kwenye wilaya yetu ambapo alielezea kuwa wamesaidia sana kuongeza hudhurio la wamama wajawazito Cliniki mara tu wapatapo Ujauzito ndani ya miezi mitatu ya Mwanzo.

Aidha, alifafanua kuwa vifo vya Watoto chini ya miaka mitano kwa mwaka 2016 vilikuwa sitini na saba (67) ambapo kwa manufaa ya Huduma bora zitolewazo na Wahudumu wa Afya vijijini ilisaidia kupunguza hadi ishirini na tisa (29) kwa mwaka 2017.

Kwa pamoja wahudumu wa Afya ngazi ya Jamii Wilayani Nyang’hwale walitoa kauli mbiu ya kazi yao mbele ya mgeni Rasmi isemayo ‘vifo vitokanavyo na uzazi, Watoto wachanga na watoto chini ya miaka mitano havikubaliki, tushirikiane kutokomeza’